廚房鋅盤去水愈嚟愈慢，通常唔係一朝一夕嘅事。煮食產生嘅油脂混合洗潔精同食物殘渣，流入喉管後遇冷凝固，形成俗稱「豬油膏」嘅白色蠟狀物，黐實管壁愈積愈厚，最終令去水口完全淤塞。
習慣一：切勿將煮食油倒入鋅盤
煎炸完嘅油應該等佢冷卻後，用廚房紙索乾或倒入廢油樽再棄置。就算係少量鑊底油，日日沖落去水口，一個月已經足以喺 U 型隔氣位形成油塞。
習慣二：安裝隔渣網，每日清理
飯粒、菜渣同咖啡渣係豬油膏嘅「鋼筋」，令油塞更加堅固。一個十蚊八蚊嘅不鏽鋼隔渣網，可以擋住九成固體殘渣，記得每日清倒。
習慣三：洗完大油膩碗碟後沖熱水
洗完打邊爐、燒肉等重油餐具後，開最熱嘅水喉沖 30 秒至 1 分鐘，可以將啱啱流入喉管、未凝固嘅油脂沖走，減少積聚機會。
習慣四：每月一次梳打粉加白醋保養
將半杯梳打粉倒入去水口，再倒入半杯白醋，起泡反應可以鬆化管壁輕微油垢，焗 15 分鐘後用熱水沖走。呢個方法溫和唔傷喉管，適合定期保養。
習慣五：去水開始慢就要處理，唔好等到完全塞死
去水明顯變慢係喉管收窄嘅先兆。早期淤塞用簡單手法已可解決，收費亦平好多；等到污水倒灌先求助，隨時要出動高壓水槍甚至拆喉，費用以倍數計。
